Lagnat Na Karamdaman, Hindi Alam ang Dahilan (Adulto)

Pangangalaga sa tahanan

Malibang binigyan ng ibang mga tagubilin ng iyong tagapangalaga ng kalusugan, sundin ang mga tagubiling ito kapag inaalagaan mo ang iyong sarili sa tahanan.

Pangkalahatang pangangalaga

• Kung hindi malala ang iyong mga sintomas, magpahinga sa bahay sa ng mga 2 hanggang 3 araw. Kapag aktibo ka na ulit, huwag hayaan ang iyong sarili na labis na mapagod.

• Para sa iyong pangkalahatang kalusugan, huwag manigarilyo. Lumayo din sa usok ng sigarilyo ng iba.

• Maaari mong maramdamam na ayaw mong kumain nang marami. Kaya't mainam ang pagkain ng kaunti. Panatilihing sapat ang tubig sa pamamagitan ng pag-inom ng 6 hanggang 8 baso ng likido kada araw. Kasama rito ang tubig, soft drinks, sports drink, mga juice, tsaa, o sabaw. Kapag mayroon kang pagbabara ng ilong, nakakatulong ang karagdagang likido na mapaluwag ang mga bara sa ilong at mga baga.

Mga Gamot

• Maaari kang uminom ng acetaminophen o ibuprofen para sa kirot o para pababain ang iyong temperatura, maliban kung binigyan ka ng ibang gamot na gagamitin. Kung mayroon kang pangmatagalang sakit sa atay o bato o nagkaroon ng ulser sa sikmura o pagdurugo ng sikmura at bituka, makipag-usap sa iyong tagapangalaga ng kalusugan bago gamitin ang mga gamot na ito. Makipag-usap din sa iyong tagapangalaga ng kalusugan kung umiinom ka ng gamot na pampigil sa pamumuo ng dugo. Huwag magbigay ng aspirin sa sinumang mas bata sa edad na 19 maliban kung itinagubilin ng tagapangalaga. Maaari itong maging sanhi ng malubhang sakit na tinatawag ng Reye syndrome. Kadalasang nakaaapekto ito sa utak at atay.

• Kung binigyan ka ng mga antibayotiko para sa impeksyon, inumin ang mga iyon hanggang sa maubos, o hanggang sa sabihin ng iyong tagapangalaga ng kalusugan na ihinto na ito. Mahalagang ubusin ang mga antibayotiko kahit na bumuti ang pakiramdam mo. Ito ay para makatiyak na wala na ang impeksyon. Hindi kadalasang ibinibigay ang mga antibayotiko para sa impeksiyon ng virus o lagnat na hindi alam ang dahilan.

• Hindi paiikliin ng mga gamot na nabibili nang walang reseta ang itatagal ng sakit. Ngunit maaring makatulong ang mga ito sa mga sintomas. Kabilang sa mga ito ang ubo, pananakit ng lalamunan, o pagbabara ng ilong o sinus. Magtanong sa iyong parmasyutiko para sa mga iminumungkahing produkto. Huwag gumamit ng mga decongestant kung mayroon kang mataas na presyon ng dugo.

Follow-up na pangangalaga

Mag-follow up sa iyong tagapangalaga ng kalusugan, o ayon sa ipinayo.

• Kung isinagawa ang pag-culture o iba pang pagsusuri sa laboratoryo, sasabihan ka kung kailangang baguhin ang iyong paggamot. Tumawag sa iyong tagapangalaga ng kalusugan ayon sa itinagubilin para sa mga resulta.

• Kung isinagawa ang mga X-ray, CT scan, MRI scan, o ultrasound, susuriin ang mga ito ng isang espesyalista. Sasabihan ka kung may anumang natagpuan sa iyong resulta na makaaapekto sa iyong pangangalaga. Tumawag sa iyong tagapangalaga ng kalusugan ayon sa itinagubilin para sa mga resulta.

Tumawag sa 911

Tumawag sa 911 kung mangyari ang alinman sa mga ito:

• Hirap huminga o lumunok, o may sipol na paghinga

• Pananakit ng dibdib

• Pagkatuliro

• Matinding pagkaantok o hirap gumising

• Pagkahimatay o pagkawala ng ulirat

• Mabilis na tibok ng puso

• Mababang presyon ng dugo

• Pagsusuka ng dugo, o maraming dugo sa dumi

• Kumbulsyon

Kailan dapat humingi ng medikal na payo

Tumawag kaagad sa tagapangalaga ng iyong kalusugan kung alinman sa mga ito ang mangyari:

• Ubo na may maraming may kulay na sputum (mucus)

• Dugo sa iyong plema

• Matinding pananakit ng ulo

• Pananakit ng mukha, leeg, lalamunan o tainga

• Pakiramdam na inaantok

• Sakit sa tiyan

• Paulit-ulit na pagsusuka o pagtatae; pagtatae na may dugo

• Pananakit ng kasu-kasuan o bagong pamamantal

• Mahapdi kapag umiihi

• Lagnat na 100.4°F (38°C) o mas mataas, o ayon sa itinagubilin ng iyong tagapangalaga

• Giniginaw na nangangaligkig

• Nanghihina o nahihilong pakiramdam